لائیو, آبنائے ہرمز اور باب المندب عالمی معیشت کی شہ رگ ہیں ان کا کھلا رہنا ناگزیر ہے: شہباز شریف

لائیو کوریج

1. 30 منٹ قبلاین اے 168 بہاولپور میں ضمنی انتخاب کی تیاری مکمل، چار لاکھ سے زائد ووٹرز کل اپنا حق رائے دہی استعمال کریں گے: الیکشن کمیشن آف پاکستان

   

   ،تصویر کا ذریعہGetty Images

   پاکستان کے صوبہ پنجاب میں قومی اسمبلی کی نشست ’این اے 168 بہاولپور‘ میں کل یعنی بروز اتوار ضمنی انتخاب ہونے جا رہا ہے۔

   بہاولپور کے قومی اسمبلی کے حلقہ این اے 168 میں ضمنی انتخاب کے لیے پولنگ 27 ستمبر کو ہوگی جہاں چار لاکھ 83 ہزار سے زائد ووٹرز اپنا حق رائے دہی استعمال کریں گے، جبکہ پولنگ کے لیے 292 پولنگ اسٹیشنز قائم کیے گئے ہیں۔

   قومی اسمبلی کی یہ نشست مسلم لیگ ن کے رکن قومی اسمبلی ملک محمد اقبال چنڑ کی وفات کے بعد خالی ہوئی تھی۔

   ضمنی انتخاب میں مسلم لیگ ن نے مرحوم اقبال چنڑ کے صاحبزادے ملک منیر اقبال چنڑ کو امیدوار نامزد کیا ہے، جبکہ دیگر امیدواروں میں ولی داد چنڑ بھی شامل ہیں۔ پیپلز پارٹی نے مسلم لیگ ن کے امیدوار کی حمایت کا اعلان کیا ہے۔

   الیکشن کمیشن آف پاکستان نے ضمنی انتخاب کے حوالے سے عوام کی شکایات کے اندراج اور بروقت ازالے کے لیے الیکشن مانیٹرنگ اینڈ کنٹرول سنٹر (EMCC) قائم کیا ہے۔

   کمیشن کے مطابق شکایات کے فوری ازالے کے لیے چار سطحوں پر کنٹرول سنٹر قائم کیے گئے ہیں، جن میں الیکشن کمیشن سیکریٹریٹ اسلام آباد کے علاوہ صوبائی، ڈویژن اور ضلعی سطح کے کنٹرول روم شامل ہیں۔

   کنٹرول سنٹر میں سوشل میڈیا اور الیکٹرانک میڈیا کی مانیٹرنگ کی سہولت بھی موجود ہے، جبکہ ای ایم سی سی آج سے نتائج موصول ہونے تک شکایات وصول کرے گا اور پولنگ کے دن سے نتائج موصول ہونے تک مسلسل کام کرے گا۔

   الیکشن کمیشن کی جانب سے جاری ہونے والے ایک بیان کے مطابق عوام انتخاب سے متعلق شکایات complaints@ecp.gov.pk پر ای میل کے ذریعے درج کرا سکتے ہیں۔ اس کے علاوہ 051111327000 ہیلپ لائن اور 0519204404 فیکس نمبر کے ذریعے بھی شکایات بھیجی جا سکتی ہیں۔

2. 46 منٹ قبلایرانی صدر مسعود پزشکیان اقوام متحدہ کی جنرل اسمبلی کے اجلاس میں شرکت کے بعد نیویارک سے تہران روانہ

   

   ،تصویر کا ذریعہGetty Images

   ایرانی میڈیا کے مطابق اقوام متحدہ کی جنرل اسمبلی کے اجلاس میں شرکت کے لیے نیویارک جانے والے ایرانی صدر مسعود پزشکیان تہران کے لیے روانہ ہو گئے ہیں۔

   دورے کے دوران مسعود پزشکیان نے اقوام متحدہ کے سیکریٹری جنرل، لبنان اور پاکستان سمیت بعض ممالک کے رہنماؤں سے ملاقاتیں کیں جبکہ فاکس نیوز اور سی بی ایس کو انٹرویوز بھی دیے۔

   اخبار دی گارڈین نے رپورٹ کیا ہے کہ ایرانی وزیر خارجہ عباس عراقچی، جو ایرانی صدر مسعود پزشکیان سے پہلے نیویارک پہنچے تھے، اتوار تک وہیں رہنے کا ارادہ رکھتے ہیں۔

3. 2 گھنٹے قبلٹرمپ نے آبنائے ہرمز کو ’ٹرمپ سٹریٹ‘ کہا، نام تبدیل کرنے کا نقشہ جاری کر دیا

   

   ،تصویر کا ذریعہ@realDonaldTrump

   امریکی صدر ڈونلڈ ٹرمپ نے ایک بار پھر اپنے سوشل میڈیا پلیٹ فارم ’ٹرتھ سوشل‘ پر آبنائے ہرمز کا ایک نقشہ جاری کیا ہے، جس پر ’ٹرمپ سٹریٹ‘ کے الفاظ درج ہیں۔

   یہ نقشہ ایسے وقت میں دوبارہ جاری کیا گیا ہے جب ایرانی حکام کا کہنا ہے کہ ’تہران نے قطر کے ذریعے امریکہ کو اپنا سات روزہ منصوبہ پیش کیا ہے۔‘ ان کے مطابق اگر واشنگٹن اس منصوبے کو قبول کر لیتا ہے تو اس کے نتیجے میں آبنائے ہرمز کھولی جا سکتی ہے اور وہاں بحری آمدورفت معمول پر آ سکتی ہے۔

   دوسری جانب وال سٹریٹ جرنل نے امریکی حکام کے حوالے سے رپورٹ کیا ہے کہ صدر ٹرمپ نے اس منصوبے کو مسترد کر دیا ہے اور اپنے معاونین سے کہا ہے کہ وہ ممکنہ طور پر نومبر کے وسط مدتی انتخابات کے بعد ایران پر دوبارہ بمباری شروع کر دیں گے۔

4. 2 گھنٹے قبلخلیج تعاون کونسل کے سیکریٹری جنرل کی سعودی عرب پر حوثیوں کے میزائل اور ڈرون حملوں کی مذمت

   

   ،تصویر کا ذریعہGetty Images

   خلیج تعاون کونسل (جی سی سی) کے سیکریٹری جنرل جاسم محمد البدیوی نے ریاض اور خمیس مشیط شہروں کو نشانہ بنانے کے لیے حوثیوں کی جانب سے کیے گئے حالیہ بیلسٹک میزائل اور ڈرون حملوں کی شدید مذمت کی ہے۔

   البدیوی نے سعودی عرب کی حمایت کا اعادہ کرتے ہوئے کہا کہ مملکت کو اپنی سلامتی، خودمختاری اور علاقائی سالمیت کے تحفظ کے لیے تمام ضروری اقدامات کرنے کا حق حاصل ہے۔

   انھوں نے عالمی برادری پر زور دیا کہ وہ حوثیوں کو ان کے اقدامات کا جواب دہ بنانے کے لیے دوٹوک مؤقف اختیار کرے۔

   اس سے قبل یمن میں سعودی قیادت میں قائم اتحاد نے کہا تھا کہ اس کے فضائی دفاعی نظام نے حوثیوں کی جانب سے ریاض کے علاقے اور خمیس مشیط کی طرف داغے گئے ڈرونز اور ایک بیلسٹک میزائل کو روک کر تباہ کر دیا۔

5. 4 گھنٹے قبلامریکہ اور اسرائیل کی ایران کے خلاف فوجی کارروائی میں یورپ کو جوابدہ ہونا چاہیے: اسماعیل بقائی

   

   ،تصویر کا ذریعہIRNA

   ایرانی وزارت خارجہ کے ترجمان اسماعیل بقائی نے کہا ہے کہ ’یورپی یونین، اس کے رکن ممالک اور نیٹو کے رکن ممالک کو ایران کے خلاف امریکہ اور اسرائیل کی فوجی کارروائی میں اپنے کردار اور شرکت پر جوابدہ ہونا چاہیے۔‘

   اسماعیل بقائی نے ایکس پر ایک بیان میں کہا کہ ’نیٹو کے سیکریٹری جنرل مارک روٹے کا بیان اس بات کا ایک اور واضح اعتراف ہے کہ یورپ نے ایران کے خلاف امریکہ اور اسرائیل کی جنگ میں جان بوجھ کر اور فعال طور پر حصہ لیا، حالانکہ جنگ کے دوران اس کی بارہا تردید کی جاتی رہی۔‘

   انھوں نے کہا کہ ’یورپی حکومتوں کی جانب سے فوجی، سیاسی، لاجسٹک یا دیگر معاونت، جس کے نتیجے میں ہلاکتیں اور تباہی ہوئی، کی تحقیقات ہونی چاہئیں۔‘

   ان کے بقول یورپی شہریوں کو اپنی حکومتوں سے اس جنگ کی حمایت یا اس میں شرکت سے متعلق فیصلوں پر جواب طلب کرنے کا حق ہے۔

   بقائی نے مزید کہا کہ ’ایندھن کی قیمتوں میں اضافے اور جنگ کے نتیجے میں پیدا ہونے والی دیگر مشکلات کو بھی اس تناظر میں دیکھا جانا چاہیے کہ یورپی حکومتوں نے اس جنگ کی حمایت اور معاونت میں کیا کردار ادا کیا۔‘

6. 4 گھنٹے قبلخمیس مشیط کی جانب آنے والا بیلسٹک میزائل مار گرایا گیا: ترکی المالکی

   

   ،تصویر کا ذریعہGetty Images

   یمن میں سعودی قیادت میں قائم اتحاد کے سرکاری ترجمان کرنل ترکی المالکی نے کہا ہے کہ ’اتحاد کے فضائی دفاعی نظام نے ایران کے حمایت یافتہ حوثیوں کی جانب سے سعودی عرب کی طرف داغا گیا ایک بیلسٹک میزائل روک کر تباہ کر دیا۔‘

   کرنل ترکی المالکی نے سنیچر کی صبح ایکس پر جاری ایک بیان میں کہا کہ ’میزائل کا رخ سعودی عرب کے شہر خمیس مشیط کی جانب تھا۔‘

   اس سے قبل اتحاد نے کہا تھا کہ ’دفاعی نظام نے حوثیوں کی جانب سے ریاض کی طرف بھیجے گئے دو ڈرونز کو بھی روک کر تباہ کر دیا۔‘

7. 4 گھنٹے قبلایران کی سات شرائط پوری ہونے تک امریکہ کو سزا دینے کا سلسلہ جاری رہے گا: پاسدارانِ انقلاب

   

   ،تصویر کا ذریعہGetty Images

   پاسدارانِ انقلاب کے ترجمان حسین محبی کا کہنا ہے کہ ’ایران کی جانب سے امریکہ کو دی جانے والی سزا کا سلسلہ اس وقت تک جاری رہے گا جب تک تہران کی مطلوبہ سات شرائط پوری نہیں ہو جاتیں۔‘

   انھوں نے کہا کہ ’امریکہ نے خلیج فارس میں اپنی افواج بھیج کر ایران سے ہتھیار ڈالنے کی توقع کی تھی، لیکن اسے ’مختلف نوعیت کی مزاحمت‘ کا سامنا کرنا پڑا۔‘

   آئی آر جی سی کے ترجمان نے یہ دعویٰ بھی کیا کہ ’دنیا کی سب سے بڑی بحریہ رکھنے کے باوجود امریکہ آبنائے ہرمز کو چند گھنٹوں کے لیے بھی کھلا رکھنے میں کامیاب نہیں ہو سکا اور اس آبی گزرگاہ کا کنٹرول اب بھی ایران کی بحری افواج کے ہاتھ میں ہے۔‘

   حسین محبی کے مطابق جنگ سے قبل روزانہ درجنوں اور بعض اوقات ایک سو سے زیادہ بحری جہاز آبنائے ہرمز سے گزرتے تھے، لیکن اب اس راستے سے صرف ایران کے تجارتی شراکت داروں سے متعلق تیل تہران کی اجازت سے گزر رہا ہے۔

   انھوں نے مزید دعویٰ کیا کہ ’حالیہ جنگ کے دوران امریکی فضائی، بحری اور زمینی افواج کے جدید سازوسامان کو ایرانی مسلح افواج نے نشانہ بنایا۔‘

8. 5 گھنٹے قبلایران جنگ کے اثرات نے یورپ کو توانائی کی قیمتوں کے بحران سے دوچار کر دیا: یورپی یونین

   

   ،تصویر کا ذریعہGetty Images

   یورپی یونین کے کمشنر برائے توانائی کا کہنا ہے کہ ’تیل اور گیس کی منڈیوں پر ایران جنگ کے اثرات نے یونین کو توانائی کی رسد میں مُشکلات کے باعث ’بحران‘ کا شکار کر دیا ہے۔

   ڈین جورگنسن نے یورپی یونین کے وزرائے توانائی کے نام ایک خط میں کہا کہ یورپ اب 2021 کے موسمِ سرما کے مقابلے میں بہتر طور پر تیار ہے، جب روس نے براعظم کو گیس کی فراہمی میں کمی کر دی تھی، تاہم حکومتوں کو آئندہ موسمِ سرما کے لیے مزید اقدامات کرنے کی ضرورت ہے۔

   انھوں نے رکن ممالک پر زور دیا کہ وہ گیس کے ذخائر بھرنے میں مدد کے لیے اقدامات کرنے یا جاری رکھنے پر غور کریں، جبکہ گیس اور بجلی کی طلب میں بھی ’جب تک ضروری ہو‘ کمی لائی جائے۔

9. 26 ستمبر 2026اسلام آباد مفاہمت کی جانب واپسی کے لیے چین کی حمایت قابلِ قدر ہے: مسعود پزشکیان

   

   ،تصویر کا ذریعہJohn Lamparski/Getty Images

   ایرانی صدر مسعود پزشکیان نے چین کے صدر شی جن پنگ کی جانب سے امریکہ اور ایران کے درمیان اسلام آباد مفاہمتی یادداشت (ایم او یو) کی بحالی کی حمایت کا خیر مقدم کیا ہے۔

   سوشل میڈیا پلیٹ فارم ایکس پر اپنے پیغام میں مسعود پزشکیان نے کہا کہ وہ اسلام آباد مفاہمتی یادداشت کی طرف واپسی اور اختلافات کو بات چیت اور سفارت کاری کے ذریعے حل کرنے کے لیے شی جن پنگ کی ’دانش مندانہ اور ذمہ دارانہ حمایت‘ کو قدر کی نگاہ سے دیکھتے ہیں۔

   ایرانی صدر مسعود پزشکیان نے مزید کہا کہ ایران بھی اسی مؤقف کی حمایت کرتا ہے اور اسلام آباد مفاہمتی یادداشت کی جانب واپسی کو اہم سمجھتا ہے۔

   انھوں نے کہا کہ پہلے سے طے شدہ وعدوں کا احترام اور سنجیدہ، با مقصد اور نتیجہ خیز مذاکرات کے لیے سازگار ماحول کی فراہمی ناگزیر ہے۔

   مسعود پزشکیان کے مطابق خود مختاری کے احترام، کشیدگی میں کمی اور خطے میں امن و استحکام کے تحفظ کے حوالے سے تہران اور بیجنگ کے درمیان ہم آہنگی مستقبل میں تعمیری تعاون کے لیے مضبوط بنیاد فراہم کرتی ہے۔

   چینی صدر شی جن پنگ نے جمعرات کے روز وائٹ ہاؤس میں امریکی صدر ڈونلڈ ٹرمپ سے ملاقات کے دوران ’اسلام آباد مفاہمتی یادداشت‘ کی طرف واپسی کی حمایت کی تھی۔

   واضح رہے کہ رواں سال جون میں پاکستان کی ثالثی میں امریکہ اور ایران کے درمیان مفاہمت کی ایک یادداشت پر دستخط ہوئے تھے۔

10. 26 ستمبر 2026ایران کے بحری محاصرے کے باعث 122 تجارتی جہازوں نے رخ تبدیل کیا: امریکی فوج کا دعویٰ

    

    ،تصویر کا ذریعہAFP via Getty Images

    امریکی فوج کی مرکزی کمان (سینٹکام) نے جمعہ کے روز دعویٰ کیا ہے کہ ایران کے بحری محاصرے کے دوسرے مرحلے کے آغاز کے بعد اب تک 122 تجارتی جہازوں کو اپنا راستہ تبدیل کرنے پر مجبور کیا گیا ہے۔

    سینٹکام کے مطابق محاصرے کے نتیجے میں ایران کی تیل کی برآمدات تقریباً معطل ہو چکی ہیں۔

    آبنائے ہرمز میں چند آئل ٹینکروں پر حملوں اور اسلام آباد مفاہمتی یادداشت کے خاتمے کے بعد جولائی کے آخر میں ایران کی بندرگاہوں کا بحری محاصرہ دوبارہ شروع کیا گیا تھا۔

    امریکہ اور اسرائیل کی ایران کے خلاف جنگ سے قبل دنیا کے تیل اور گیس کی مجموعی ترسیل کا تقریباً پانچواں حصہ آبنائے ہرمز کے راستے منتقل کیا جاتا تھا، تاہم حالیہ کشیدگی کے باعث اس اہم بحری گزر گاہ میں جہاز رانی بری طرح متاثر ہوئی ہے۔

11. 26 ستمبر 2026مکہ مشترکہ دفاعی معاہدے کے فریق ممالک کے عسکری سربراہان کا ریاض میں اجلاس

    

    ،تصویر کا ذریعہISPR

    پاکستان فوج کے شعبۂ تعلقاتِ عامہ (آئی ایس پی آر) کے مطابق مکہ مشترکہ دفاعی معاہدے کے رکن ممالک کے چیف آف ڈیفنس فورسز اور چیفس آف جنرل سٹاف کا اجلاس جمعہ کے روز ریاض میں منعقد ہوا، جس میں سعودی عرب، پاکستان اور ترکی کے اعلیٰ عسکری حکام نے شرکت کی۔

    بیان کے مطابق اجلاس میں خطے کی مجموعی سکیورٹی صورتحال اور سعودی عرب کو درپیش خطرات کا جائزہ لیا گیا۔ شرکا نے مکہ، شہری تنصیبات اور اقتصادی انفراسٹرکچر کو نشانہ بنانے والے حملوں پر تشویش کا اظہار کیا۔

    اعلامیے کے مطابق تینوں ممالک کے عسکری حکام نے باہمی دفاعی تعاون کو مزید فروغ دینے، انٹیلی جنس کے تبادلے، فوجی رابطوں اور آپریشنل ہم آہنگی میں اضافے سمیت دفاعی صلاحیتوں کے انضمام پر بھی تبادلہ خیال کیا۔

    شرکا کا کہنا تھا کہ ان اقدامات سے دفاعی صلاحیت اور اجتماعی دفاع کے نظام کو مزید مضبوط بنایا جا سکے گا۔

    آئی ایس پی آر کے مطابق اجلاس کے شرکا نے اجتماعی دفاع کے عزم کا اعادہ کرتے ہوئے اس بات پر زور دیا کہ تینوں ممالک سعودی عرب کی سلامتی، خود مختاری اور علاقائی سالمیت کے دفاع کے لیے پرعزم ہیں۔

12. 25 ستمبر 2026پاکستان کا پانی روکنے یا رخ موڑنے کی کوشش اعلان جنگ سمجھی جائے گی: شہباز شریف

    

    ،تصویر کا ذریعہRyan Murphy/Getty Images

    اقوام متحدہ جنرل اسمبلی اجلاس سے خطاب میں وزیر اعظم شہباز شریف نے کہا کہ انڈیا نے سندھ طاس معاہدہ معطل کرنے کا یک طرفہ فیصلہ کیا جسے اقوام متحدہ اور ثالثی عدالت بھی غیر قانونی قرار دے کر مسترد کر چکی ہیں۔

    ان کا کہنا تھا کہ پانی کو ہتھیار کے طور پر استعمال نہیں کیا جا سکتا اور پاکستان کے پانی کو ’روکنے یا اس کا رخ موڑنے کی کسی بھی کوشش کو اعلانِ جنگ تصور کیا جائے گا۔‘

    اپنے خطاب میں شہباز شریف نے کہا کہ جموں و کشمیر کے تنازع کا منصفانہ اور پائیدار حل خطے میں امن کے کے لیے ضروری ہے۔

    انھوں نے اقوام متحدہ پر زور دیا کہ وہ کشمیریوں کے حق خود ارادیت سے متعلق اپنی قراردادوں اور وعدوں پر عمل درآمد کو یقینی بنائے۔

    شہباز شریف نے کہا کہ فلسطینی عوام کئی نسلوں سے اپنی آزادی کے لیے جدوجہد کر رہے ہیں۔

    اپنے خطاب میں انھوں نے کہا کہ غزہ میں پیدا ہونے والے ہر بچے کو بھی دنیا کے کسی دوسرے حصے میں پیدا ہونے والے بچے کی طرح جینے کا حق حاصل ہے۔

    وزیر اعظم پاکستان کا کہنا تھا کہ اسرائیلی کارروائیوں کا مغربی کنارے تک پھیلنا انتہائی تشویش ناک ہے، اور یہ دعویٰ بھی کیا کہ ’فلسطینیوں کی جبری بے دخلی اسرائیل کے نسل کشی کے ایجنڈے کی عکاسی کرتی ہے۔‘

    انھوں نے کہا کہ پاکستان 1967 سے پہلے کی سرحدوں پر مشتمل ایک آزاد اور خود مختار فلسطینی ریاست کے قیام کی حمایت کرتا ہے۔

    وزیر اعظم نے لبنان اور شام کے خلاف جاری اسرائیلی کارروائیوں کی بھی مذمت کی۔

    اپنے خطاب میں شدت پسندی کے مسئلے پر بات کرتے ہوئے شہباز شریف نے کہا کہ یہ عالمی امن اور سلامتی کے لیے ایک سنگین خطرہ بن چکی ہے۔

    انھوں نے یہ بھی دعویٰ کیا کہ شدت پسند تنظیمیں تحریک طالبان پاکستان اور بلوچ لبریشن آرمی افغان سر زمین کو پاکستان کے خلاف استعمال کر رہے ہیں۔

13. 25 ستمبر 2026آبنائے ہرمز اور باب المندب کا کھلا رہنا نا گزیر ہے: شہباز شریف

    

    ،تصویر کا ذریعہAFP via Getty Images

    اقوام متحدہ جنرل اسمبلی کے اجلاس سے خطاب میں وزیر اعظم شہباز شریف کا کہنا ہے کہ آبنائے ہرمز اور باب المندب عالمی معیشت کی ’شہ رگ ہیں اور ان کا کھلا رہنا نا گزیر ہے۔‘

    انھوں نے کہا کہ یہ آبی گزر گاہیں تصادم اور کشیدگی کے مراکز کے بجائے ممالک کو آپس میں جوڑنے کا ذریعہ ہونی چاہییں۔ ’ان سمندری راستوں کو جنگ کے خطرات کے بجائے خوشحالی اور ترقی کا پیغام لے کر چلنا چاہیے۔‘

    وزیراعظم نے یمن کے حوثیوں کی جانب سے سعودی عرب کے خلاف حالیہ کارروائیوں کی مذمت کی۔

    انھوں نے کہا کہ مکہ پر ڈرون حملے کی کوشش نے دنیا بھر کے مسلمانوں کو غم و غصے میں مبتلا کر دیا ہے۔

    شہباز شریف کا کہنا تھا کہ حرمین شریفین کے امن، تحفظ اور تقدس کو کسی بھی قسم کا خطرہ ایک ایسی سرخ لکیر ہے جسے کبھی عبور نہیں کیا جانا چاہیے۔

    وزیر اعظم نے کہا کہ پاکستان ہمیشہ کی طرح سعودی عرب اور اس کے عوام کے ساتھ مکمل یکجہتی کا اظہار کرتا ہے اور دونوں ممالک کے درمیان برادرانہ تعلقات کی ایک طویل تاریخ موجود ہے۔

    شہباز شریف نے اقوامِ متحدہ جنرل اسمبلی کے اجلاس سے خطاب کرتے ہوئے کہا کہ پاکستان، سعودی عرب اور ترکی کے درمیان تاریخی مکہ مشترکہ دفاعی معاہدہ خطے میں امن، استحکام اور دفاعی تعاون کے فروغ کا ضامن ہے۔

    وزیراعظم کا کہنا تھا کہ تینوں ممالک کا یہ اتحاد کسی ملک کے خلاف نہیں بلکہ علاقائی امن اور استحکام کے قیام کے لیے مشترکہ کوششوں کا مظہر ہے۔

    انھوں نے کہا کہ یہ دفاعی معاہدہ خطے میں دفاع، استحکام اور امن کے لیے ہمارے اجتماعی عزم کا اظہار ہے اور اس کا مقصد باہمی تعاون کو مزید مضبوط بنانا ہے۔

    شہباز شریف نے اس عزم کا اعادہ کیا کہ پاکستان اپنے اتحادی ممالک کے ساتھ مل کر خطے میں امن، سلامتی اور ترقی کے فروغ کے لیے کردار ادا کرتا رہے گا۔

14. 25 ستمبر 2026اقوام متحدہ جنرل اسمبلی کے اجلاس سے وزیر اعظم پاکستان شہباز شریف کا خطاب

    

    ،تصویر کا ذریعہAFP via Getty Images

    وزیراعظم پاکستان شہباز شریف کا اقوام متحدہ کی جنرل اسمبلی کے اجلاس سے خطاب جاری ہے۔

    انھوں نے کہا کہ رواں سال فروری میں خلیجی خطے اور وسیع تر مشرقِ وسطیٰ میں جاری تنازع کے باعث قیمتی جانوں کا نقصان ہوا، معیشتیں متاثر ہوئیں اور اہم بحری گزر گاہیں، خصوصاً آبنائے ہرمز، شدید دباؤ کا شکار رہیں۔

    انھوں نے کہا کہ ایسے وقت میں پاکستان نے ’فوری اپنا کردار ادا کیا اور سفارتی کوششوں کے ذریعے واشنگٹن اور تہران کو اسلام آباد میں مذاکرات کی میز پر لانے میں کامیابی حاصل کی۔‘

    وزیراعظم کے مطابق اسلام آباد مذاکرات اور بعد ازاں طے پانے والی اسلام آباد مفاہمتی یادداشت (ایم او یو) کے ذریعے تنازع کے خاتمے کے لیے کئی اہم اور تاریخی اقدامات کیے گئے۔

    شہباز شریف نے اس موقع پر فیلڈ مارشل سید عاصم منیر کی کوششوں کو خراجِ تحسین پیش کرتے ہوئے کہا کہ انتہائی مشکل اور چیلنجنگ حالات میں ان کی مسلسل کاوشوں نے سفارت کاری کے لیے مواقع پیدا کیے۔

    انھوں نے نائب وزیراعظم اور وزیر خارجہ اسحاق ڈار کی خدمات کو بھی سراہا۔

    وزیر اعظم پاکستان نے کہا کہ ’افسوس کے ساتھ‘ حالیہ دنوں میں کشیدگی میں ایک بار پھر خطرناک اضافہ دیکھا گیا ہے، تاہم میزائلوں، ڈرونز اور ہتھیاروں کی گھن گرج کے درمیان سفارت کاری اور مذاکرات کی آواز پہلے سے زیادہ مضبوط انداز میں بلند ہونی چاہیے۔

15. 25 ستمبر 2026تحریکِ انصاف کا لانگ مارچ 4 اکتوبر کو اسلام آباد کے لیے روانہ ہو گا: وزیر اعلیٰ سہیل آفریدی, بلال احمد، بی بی سی اردو، پشاور

    

    ،تصویر کا ذریعہPTI

    پاکستان تحریک انصاف (پی ٹی آئی) نے لانگ مارچ کی نئی تاریخ چار اکتوبر مقرر کر دی ہے۔

    وزیر اعلیٰ ہاؤس پشاور میں پریس کانفرنس کرتے ہوئے وزیر اعلیٰ خیبر پختونخوا سہیل آفریدی نے کہا کہ سیاسی کمیٹی کے اجلاس میں متفقہ طور پر لانگ مارچ کی تاریخ چار اکتوبر مقرر کرنے کا فیصلہ کیا گیا ہے۔

    انھوں نے کہا کہ پی ٹی آئی ایک سیاسی جماعت ہے اور پُر امن سیاسی جدوجہد پر یقین رکھتی ہے۔

    سہیل آفریدی کا کہنا تھا: ’یہ لوگ چاہتے ہیں کہ ہمیں اشتعال دلایا جائے، لیکن ہم ان کے اشتعال میں نہیں آئیں گے۔‘

    انھوں نے کہا کہ اگر عدالتیں انصاف کے تقاضوں کے مطابق فیصلے کریں تو عمران خان ’آدھے گھنٹے میں رہا ہو سکتے ہیں۔‘

    وزیر اعلیٰ نے الزام عائد کیا کہ پارٹی کارکنوں کو گرفتار کیا جا رہا ہے اور سیاسی سرگرمیوں میں رکاوٹیں ڈالی جا رہی ہیں۔

    سہیل آفریدی نے کہا کہ کارکنان لانگ مارچ کی نئی تاریخ پر مطمئن ہیں اور پارٹی قیادت کے فیصلے کی حمایت کر رہے ہیں۔

    ان کا کہنا تھا کہ ’ہم نے ٹاس جیتا ہے۔ لانگ مارچ اپنے مطالبات منوانے کے لیے کر رہے ہیں۔ ہم چاہتے ہیں کہ مذاکرات ہوں، لیکن اس وقت جو لوگ نکلیں گے وہ ماضی کے تمام ریکارڈ توڑ دیں گے۔‘

    پریس کانفرنس میں وزیر اعلیٰ خیبر پختونخوا نے کہا کہ تحریک انصاف اپنے مطالبات کی منظوری تک واپس نہیں جائے گی۔

    ’ہم اپنے مطالبات منوائے بغیر واپس نہیں جائیں گے۔ لانگ مارچ کی تاریخ آگے بڑھانا ہمارا سیاسی حربہ ہے۔‘

16. 25 ستمبر 2026وزیراعلیٰ خیبر پختونخوا سہیل آفریدی آج رات 9:30 بجے پریس کانفرنس کریں گے: شفیع جان

    

    ،تصویر کا ذریعہScreengrab

    خیبر پختونخوا کے وزیر اطلاعات شفیع جان نے کہا ہے کہ وزیر اعلیٰ خیبر پختونخوا علی امین گنڈاپور آج رات ساڑھے نو بجے وزیر اعلیٰ ہاؤس پشاور میں اہم پریس کانفرنس کریں گے۔

    سوشل میڈیا پلیٹ فارم ایکس پر جاری اپنے پیغام میں شفیع جان نے لکھا کہ وزیر اعلیٰ ’سہیل آفریدی وزیر اعلیٰ ہاؤس خیبر پختونخوا میں ساڑھے نو بجے اہم پریس کریں گے۔‘

17. 25 ستمبر 2026بلوچستان میں سکیورٹی فورسز کے مختلف آپریشنز، 33 مبینہ شدت پسند ہلاک: آئی ایس پی آر

    

    ،تصویر کا ذریعہGetty Images

    فوج کے شعبۂ تعلقاتِ عامہ آئی ایس پی آر کے مطابق بلوچستان میں جاری انسدادِ دہشت گردی کی کارروائیوں کے دوران 21 ستمبر سے اب تک مجموعی طور پر 33 مشتبہ شدت پسند ہلاک کیے جا چکے ہیں۔

    آئی ایس پی آر سے جاری بیان کے مطابق ’24 ستمبر کو آپریشن شابان کے تسلسل میں سکیورٹی فورسز نے شدت پسندوں کے مزید ٹھکانے تباہ کیے۔ بیان کے مطابق فائرنگ کے تبادلے میں پانچ مشتبہ شدت پسند ہلاک ہوئے، جس کے بعد سکیورٹی اداروں کے آپریشن میں ہلاک ہونے والوں کی مجموعی تعداد 22 ہو گئی۔

    آئی ایس پی آر کا کہنا ہے کہ شدت پسندوں کے ٹھکانوں سے اسلحہ، گولہ بارود اور دھماکہ خیز مواد بھی برآمد کیا گیا اور علاقے میں تاحال کلیئرنس آپریشن جاری ہے۔

    فوج کے مطابق ایک اور کارروائی 25 ستمبر کو ضلع نوشکی میں انٹیلیجنس اطلاعات کی بنیاد پر کی گئی۔

    بیان میں کہا گیا ہے کہ سکیورٹی فورسز نے عسکریت پسندوں کے ایک ٹھکانے کو نشانہ بنایا اور فائرنگ کے تبادلے کے بعد 11 مشتبہ شدت پسند ہلاک ہو گئے۔

    آئی ایس پی آر کے مطابق سکیورٹی فورسز اور قانون نافذ کرنے والے اداروں کی انسدادِ دہشت گردی کارروائیاں نیشنل ایکشن پلان کے تحت جاری رہیں گی۔

18. 25 ستمبر 2026’ہم اپنی مرضی سے آئیں گے‘: وزیر اطلاعات خیبر پختونخوا شفیع جان کا عطا تارڑ کی پریس کانفرنس پر ردعمل

    

    خیبر پختونخوا کے وزیر اطلاعات شفیع جان نے وفاقی وزیر اطلاعات عطا تارڑ کی پریس کانفرنس پر ردعمل دیتے ہوئے کہا ہے کہ ’ہم اپنی مرضی سے آئیں گے، جبکہ ان کی چیخیں بتا رہی ہیں کہ عمران خان اور سہیل آفریدی جیت چکے ہیں۔‘

    سوشل میڈیا پلیٹ فارم ایکس پر جاری اپنے بیان میں شفیع جان نے کہا کہ حکومتی حلقوں کے بیانات ان کی پریشانی کو ظاہر کر رہے ہیں۔ شفیع جان کا یہ بیان وفاقی وزیر اطلاعات عطا تارڑ کی حالیہ پریس کانفرنس کے بعد سامنے آیا، جس میں انھوں نے خیبرپختونخوا کے وزیر اعلی سہیل آفریدی پر تنقید کرتے ہوئے کہا ہے کہ ’پی ٹی آئی بزدل ہے اس لیے لانگ مارچ سے بھاگ گئی ہے۔

    سہیل آفریدی وزیر اعلیٰ کم اور ٹی ٹی پی کے کمانڈر زیادہ لگتے ہیں۔‘ انھوں نے دعویٰ کیا کہ ’پی ٹی آئی کی لانگ مارچ کی بھی کوئی تیاری نہیں اور اس لیے یہ اس احتجاج سے بھاگ گئے ہیں۔ ہمت ہے تو آئیں اور کریں مارچ۔‘

19. 25 ستمبر 2026حوثیوں کے سعودی عرب پر مسلسل حملے قابلِ مذمت ہیں، سلامتی کونسل

    اقوام متحدہ کی سلامتی کونسل نے یمن کے حوثی باغیوں کی جانب سے سعودی عرب پر بڑھتے ہوئے حملوں کی مذمت کی ہے۔

    اقوام متحدہ میں فرانس کے نمائندے اور سلامتی کونسل کے موجودہ صدر جیروم بونفون نے اپنے مشترکہ بیان میں کہا کہ ’سلامتی کونسل کے اراکین نے سعودی عرب پر حوثیوں کے مسلسل حملوں کی شدید الفاظ میں مذمت کی ہے۔‘

    بیان میں کہا گیا کہ ان حملوں میں شہری اور توانائی کے بنیادی ڈھانچے کو نشانہ بنانے والے حملے بھی شامل ہیں جن کے نتیجے میں خواتین اور بچوں سمیت عام شہری زخمی ہوئے ہیں۔

20. 25 ستمبر 2026پاکستان میں ہفتہ وار مہنگائی میں تقریباً 12 فیصد کا بڑا اضافہ, تنویر ملک، صحافی

    

    ،تصویر کا ذریعہGetty Images

    پاکستان میں موجودہ ہفتے کے اختتام تک ہفتہ وار مہنگائی میں سالانہ بنیاد پر 11.92 فیصد کا بڑا اضافہ ریکارڈ کیا گیا جس کی وجہ بڑی وجہ مشرق وسطیٰ میں جنگ کی وجہ سے تیل کی قیمتوں کے بعد پاکستان میں ڈیزل اور پیٹرول کی قیمتوں میں ہونے والا اضافہ رہا۔

    پاکستان کے شماریات بیورو کی جانب سے جاری کردہ اعداد و شمار کے مطابق موجودہ ہفتے کے اختتام پر گزشتہ ہفتے کے مقابلے میں بھی اشیا کی قیمتوں میں ایک فیصد کا اضافہ ہوا۔

    اعداد و شمار کے مطابق موجودہ ہفتے میں گزشتہ سال کے موجودہ ہفتے کے مقابلے میں ڈیزل کی قیمت میں 51 فیصد، پیٹرول کی قیمت میں 47.50 فیصد، ایل پی جی کی قیمت میں 64 فیصد، بجلی کی قیمت میں 59 فیصد کا اضافہ ریکارڈ کیا گیا۔

    اسی طرح پیاز کی قیمت میں 116 فیصد، گندم آٹے کی قیمت میں 32.41 فیصد، مٹن 15.75 فیصد، بیف 13.22 فیصد تک اضافہ ہوا۔

    دوسری جانب زیر جائزہ ہفتے کے دوران آلو کی قیمت میں 39 فیصد، چینی کی قیمت میں 21 فیصد، ٹماٹر کی قیمت میں 19 فیصد، انڈوں کی قیمت میں 18 فیصد تک کی کمی ریکارڈ کی گئی۔

    پاکستان میں معاشی ماہرین کے مطابق ہفتہ وار بنیاد پر مہنگائی میں بڑے اضافے کی وجہ مشرق وسطیٰ میں جنگ کی وجہ سے تیل کی قیمتوں میں ہونے والا اضافہ ہے جس کی وجہ سے پاکستان میں ڈیزل اور پیٹرول کی قیمت میں اضافہ ہوا اور اس کا اثر دوسرے اشیا کی قیمتوں پر بھی پڑا۔

    معاشی ماہر سمیع اللہ طارق نے بی بی سی اردو کو بتایا کہ ہفتہ وار مہنگائی میں بڑے اضافے کی وجہ سے خطے کی جیو پولیٹیکل حالات ہیں جس کی وجہ سے فیول کی قیمت بڑھی۔

    انھوں نے کہا تاہم اگلے ہفتے چیزوں کی قیمتوں میں تھوڑی سی کمی ہو سکتی ہے کیونکہ ملک میں ڈیزل اور پیٹرول کی قیمت میں تھوڑی بہت کمی ریکارڈ کی گئی ہے۔